Grekio ne kapablis doni kontentigan klarigon al la Eŭropa Komisiono pri Socialaj Rajtoj en Strasburgo pri sia amasa segregacio de romaoj. Konsultkunveno ĉe la Komisiono okazis sekve al plendo farita de la Eŭropa Centro por Romaaj Rajtoj (Budapeŝto) pri la traktado de romaoj fare de la greka ŝtato. La hungara eŭro-deputitino Lívia Járóka, mem romao, diris antaŭ la komisiono ke ŝi neniam spertis tiel malbonajn kondiĉojn kiel en la loĝlokoj de grekiaj romaoj. (RSK)

Laŭ plendo lastatempe farita de la Eŭropa Centro por Romaaj Rajtoj (ERRC), kun sidejo en Budapeŝto, la greka ŝtato regule kaj sisteme malrespektas la rajton de tiulandaj romaoj je kontentiga loĝado. Freŝdata ekzemplo por tio estis elloĝigo de familioj el Patras, Riganokampos, lige al la olimpikaj ludoj. Kabanoj de romaaj familioj esti senaverte, brutale detruitaj de lokaj aŭtoritatoj. Okaze de la kunveno, la greka ŝtato estus povinta doni klarigon pri la manko de kontentigaj dispozicioj por eviti la elloĝigojn kaj pri la eblaj manieroj atente sekvi la efektiviĝon de loĝrilataj programoj enkondukitaj de la greka registaro. Laŭ prijuĝo de la komisionanoj, la ĉeestantaj anoj de la registaro tamen ne kapablis doni kontentigajn respondojn.

Kunlaborantoj de ERRC estis indignitaj pro la tutlanda rifuzemo de lokaj reprezentantoj funkciigi procedurojn jam ekzistantajn por plibonigi la loĝkondiĉojn de romaoj. La greka registaro regule emfazas ke ĝi ne intencas okupiĝi pri lokaj organoj malkunlaboremaj kiuj segregacias romaajn loĝantojn.

Claude Cahn, estro de la programo ĉe ERRC diris al la Romaa Gazetara Centro (RSK): "la neagemo de Grekio fariĝis evidenta. En Grekio duono de la romaaj komunumoj loĝas izolitaj, sen aliro al publikaj servoj, en medio kun alta infektorisko, en budoj faritaj el koto."

La plendo kontraŭ la greka ŝtato altiris la atenton de multaj organizaĵoj. Eŭro-deputitino L?via J?r?ka, mem romao, diris antaŭ la komisiono: "neniam mi vidis pli malbonajn loĝkondiĉojn ol tiuj en romaj loĝlokoj en Grekio."

Sekva paŝo en la afero atendeblas plej frue en decembro, kiam la Eŭropa Komisiono de Socialaj Rajtoj formulos sian rekomendon. Decido de la Ministra Komitato de la Eŭropa Konsilio estas atendebla en marto 2005.

Flóra László, RSK



Ertl István fordítása
Tradukinto: Ertl István





«