Hodiaŭ la Eŭropa Parlamento alvokis en oficiala dokumento la slovakan registaron plibonigi la ekonomian kaj socialan situacion de la romaa komunumo kaj entrepreni paŝojn kontraŭ ilia ekskludo en la kampoj de edukado, laboro kaj publikaj servoj. (RSK)

Dum la diskuto koncerne la raporton Brok pri la stato de prepariĝo en la aliĝontaj EU-landoj, socialista amendopropono estis akceptita per granda plimulto de voĉoj, alvokanta la slovakan registaron al plibonigo de la ekonomia kaj sociala situacio de la romaoj en Slovakio kaj entrepreno de paŝoj kontraŭ ilia ekskludo.

Socialista eŭrodeputito Hannes Swoboda komentis jene al la Romaa Gazetara Centro (Budapeŝto): "temas pri forta averto al la slovaka ŝtato, urĝanta solvon de la situacio ekestinta en la lastaj semajnoj". Laŭ Swoboda "ankaŭ la decidfarantoj de Eŭropa Unio portas kulpon pro sia troa atento al demandoj sole buĝetaj de la aliĝontaj landoj - tio malhelpas ilin atenti la socialan situacion de la malplej riĉaj, i.a. la romaoj."

Romaa Gazetara Centro

(En la lasta semajno de februaro diversloke en Orienta Slovakio romaoj sturmis manĝvendejojn kaj forportis varojn sen pago. Kiel motivon ili nomis la drastan malaltiĝon de socialaj pagoj, kiu estas konsekvenco de la registara politiko fortiganta la tutmondan konkurenc-kapablon de Slovakio i.a. per gravaj tranĉoj buĝetaj en la kampoj de sano, instruado kaj pensioj. - la trad.)

Tradukinto: Ertl István





«