La hungara prezidento Ferenc Mádl atribuis Kavaliran Krucon de la Meritordeno de la Hungara Respubliko al la Brusela violon-artisto Róbert Lakatos pro lia diskonigo de la hungara kulturo, specife de cigana muziko. La distingo estis transdonita al la meritulo lastan lundon vespere, en la hungara ambasado en Bruselo. (MTI)

Róbert Lakatos (pli bone konata en la mondo de muziko kiel Roby Lakatos) estas rekt-linia posteulo de la legenda muzikisto cigana, János Bihari. Li edukiĝis en artista familio, muzikante kune kun siaj patro kaj gefratoj, kaj unuafoje koncertis jam en la aĝo de 9 jaroj. Fininte siajn studojn, li veturis al Bruselo por trimonata kontrakto, sed pro liaj grandaj sukcesoj la kontrakto ricevis plilongigon. Jam 19 jarojn Lakatos loĝas do en Bruselo.

Fondinte sian orkestron, li evoluigis apartan stilon, kiu miksas ciganan kun klasika muziko kaj kun ĵazo, kaj kiu igis lin rikolti tutmondan sukceson. Li donis koncertojn en preskaŭ ĉiuj mondpartoj. Ekzemple, ĉiujare li ricevas invitojn al Japanio, kaj li koncertis kun artistoj de monda renomo kiel Yehudi Menuhin. Liaj ligoj al Hungario neniam malfortiĝis: en 1999 li registris en Budapeŝto la diskon "Live from Budapest" ("Rekte el Budapeŝto"), kaj li kutimas aperi en la hungaraj kultursemajnoj organizataj en Belgio.



Tradukinto: Ertl István





«