La polico en Los-Angxeleso estas en alarmostato, post kiam tribunalo malkondamnis blankan policiston, kiu pasintjare brutale batis nigran 16-jarulon. En 1992 okazis tumultoj en la usona metropolo, post simila tribunala malkondamno de blankaj policistoj. (RTL Klub)

Amatora vidbenda registrajxo pri cxi tiu policista interveno kauzis enorman indignon tra tuta Usono. La policisto devis alfronti enketon, kaj kolego provinta prisilentigi la aferon estis suspendita.

La brutala policisto diris al la tribunalo ke estis necese uzi perforton pro la malamika sinteno de la knabo, kiam demandita pri la eksvalida trafikpermeso de lia auto. Policisto Jeremy Morse asertis ke la junulo kauzis al li grandan doloron kaptante liajn testikojn, kvankam cxi tio ne estas videbla sur la registrajxo.

La jxurio, inter kies membroj trovigxis nur unu nigrulo, ne povis veni al unueca starpunkto en la afero de Jeremy Morse, kaj malkondamis lian kolegon.

Dum la akuzito esprimis sian gxojon, iu en la publiko kriis : "Ne estas justeco!" Nigruloj volas novan proceson.

"Cxi tiu verdikto estas frapo en la vizagxon de nia komunumo, kiun ni ne povas toleri. Ni faros cxion por ke Jeremy Morse trafu en prizonon" - diris estro de la nigra komunumo.

Antau dek unu jaroj, kiam tribunalo malkondamis kvar blankajn policanojn, ribelecaj tumultoj en Los-Angxeleso kauzis 55 mortojn. La polico estis nun metita en alarmostaton.

Ertl Isván fordítása





«